2024 թվականի հոկտեմբերի 23-ից նոյեմբերի 9-ը Երևանի Նորայր Աճեմյանի անվան տարածաշրջանային թիվ 2 պետական քոլեջ ՊՈԱԿ-ի տնօրենի պ/կ Նարա Հովհաննիսյանը Չինաստանի Ժողովրդական Հանրապետության, քաղաք Նանչանգում մասնակցեց «Մասնագիտական կրթություն՝ նախատեսված զարգացող երկրների պաշտոնյաների համար» խորագրով դասընթացին /Հրավիրող կողմ- Ջիանսի արտասահմանյան հետազոտությունների քոլեջ/։
Դասընթացը ներառել է դասախոսություններ, քննարկումներ, խմբային աշխատանքներ, այցելություններ ոլորտի մասնագիտական հաստատություններ, շնորհանդեսներ։
Թեմայի տեսական ուսումնասիրությունը կրել է համապարփակ բնույթ՝ ներառելով Չինաստանի ինչպես մասնագիտական կրթության և ուսուցման, այնպես էլ սոցիալ-մշակութային ոլորտներին անդրադարձ կատարող դասախոսություններ։
Մասնավորապես ներկայացվել են․ 
•    Չինաստանի պատմությունը, մշակույթը, կառավարման համակարգը,
•    Չինաստանում ժամանակակից մասնագիտական կրթության և ուսուցման (ՄԿՈՒ) համակարգի բարեփոխումների ձևաչափերն ու ուղղությունները,
•    ՄԿՈՒ մասին նոր օրենքը, 
•    ՄԿՈՒ ոլորտի ռազմավարությունը և որակի բարելավման ուղղությամբ կատարված քայլերը,
•    Քոլեջների՝ տարբեր կառույցների ենթակայությամբ գործունեության առանձնահատկությունները,
•    Ջիանգշի նահանգում ՄԿՈՒ զարգացման և գործունեության առանձնահատկությունները,
•    ՄԿՈւ զարգացման մարտահրավերներն ու զարգացման միջոցառումները,
•    Քոլեջներում կառավարման ներքին համակարգի ներդրումը, 
•    ՄԿՈՒ ոլորտում արդյունաբերության և կրթության ինտեգրման գործնական օրինաչափությունները։
Դասընթացի շրջանակում կազմակերպված սիմպոզիումի ընթացքում Ն․ Հովհաննիսյանը հանդես է եկել Երևանի տարածաշրջանային թիվ 2 պետական քոլեջի մասին տեղակատվական տեսասահիկով, որտեղ ներկայացվել է քոլեջի պատմությունը, առկա մասնագիտությունները, գործունեության մասին համապարփակ տեղեկատվություն։ 
Բոլոր մասնակիցների ելույթներից հետո, սիմպոզիումին մասնակցող չինական կողմի քոլեջների ու համալսարանների ներկայացուցիչների հետ հայկական պատվիրակությունը ունեցել է առանձին քննարկումներ՝ նախանշելու հնարավոր համագործակցության ձևաչափերը և ուղղությունները։